නාවික හමුදාව විසින් ත්‍රිකුණාමලය, සල්ලි සාම්පල්තිව් ප්‍රදේශයේදී සහ ත්‍රිකුණාමලයට ඔබ්බෙන් වූ මුහුදු ප්‍රදේශයේ ඊයේ රාත්‍රියේ සිදුකළ විශේෂ සෝදිසි මෙහෙයුමකදී, නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සහ කළ බවට සැකකෙරෙන පුද්ගලයන් 67 දෙනෙකු නාවික හමුදා භාරයට ගැනීමට කටයුතු කර තිබෙනවා.
ඒ අනුව, ත්‍රිකුණාමලය, නාවික තඨාකාංගණයේ නාවික හමුදා කණ්ඩායමක් නිලාවේලී පොලිසිය හා එක්ව ත්‍රිකුණාමලය, සල්ලි සාම්පල්තිව් ප්‍රදේශයේ ඊයේ රාත්‍රියේ විශේෂ සෝදිසි මෙහෙයුමක් දියත් කර තිබෙනවා.
එහිදී එම ප්‍රදේශයේ සැක කටයුතු ලෙස රැඳී සිටි නීති විරෝධී ලෙස මුහුදු මාර්ගයෙන් මෙරටින් සංක්‍රමණය වීමට සුදානම්ව සිටි බවට සැක කෙරෙන වයස අවුරුදු 30ත් 40ත් අතර වයසේ පසුවන පිරිමි පුද්ගලයන් 12ක් සමඟ ත්‍රි රෝද රථ 02ක්, කැබ් රථයක් සහ වෑන් රථයක් අත්අඩංගුවට ගැනීමට සමත්ව තිබෙනවා.
අනතුරුව, එම අත්අඩංගුවට සැකකරුවන්ගෙන් අනාවරණය වූ තොරතුරුමත නැගෙනහිර නාවික විධානයට අනුයුක්ත හතරවන වේග ප්‍රහාරක බලඝණයට අයත් පි 483 සහ පි 415 යන වේග ප්‍රහාරක යාත්‍රා යොදවා ත්‍රිකුණාමලයට ඔබ්බෙන් වූ මුහුදු ප්‍රදේශයේ සිදුකළ සෝදිසි මෙහෙයුමේදී සැකකටයුතු මෙරට බහුදින ධීවර යාත්‍රාවක් නිරීක්‍ෂණය කර පරීක්‍ෂාවට ලක් කර තිබෙනවා.
එහිදී, එම බහුදින ධීවර යාත්‍රාවේ සිටි නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සාහ කල බවට සැක කෙරෙන ජාවාරමට සම්බන්ධ පුද්ගලයන් පස් දෙනෙකු ද ඇතුළුව, පිරිමි පුද්ගලයන් 45ක්, කාත්තාවන් 07ක් සහ කුඩා දරුවන් 03ක් ඇතුළු වයස අවුරුදු 03ත් 53ත් අතර වයසේ පසුවන පුද්ගලයන් 55 දෙනෙකු එම බහුදින ධීවර යාත්‍රාව සමඟ නාවික හමුදා භාරයට ගැනීමට කටයුතු කර තිබෙනවා.
නාවික හමුදා භාරයට ගත් නීති විරෝධී ලෙස සංක්‍රමණය වීමට උත්සාහ කළ බවට සැකකෙරෙන මෙම පිරිස යාපනය, ත්‍රිකුණාමලය, මඩකළපුව, පුත්තලම, අම්පාර, රත්නපුරය, ගම්පහ සහ කොළඹ යන ප්‍රදේශයන්හී පදිංචිකරුවන් බවට හඳුනා ගෙන තිබෙනවා.
එමෙන්ම, සල්ලි සාම්පල්තිව් ප්‍රදේශයේදී අත්අඩංගුවට ගත් පිරිස ඉදිරි නීතිමය කටයුතු සඳහා නිලාවේලි සහ උප්පුවේලී යන පොලිස් ස්ථානයන් වෙත භාර දීමට කටයුතු කරමින් පවතින අතර, ත්‍රිකුණාමලයට ඔබ්බෙන් වූ මුහුදේදී වේගප්‍රහාරක යාත්‍රා මඟින් නාවික හමුදා භාරයටගත් පිරිස ඉදිරි නීතිමය කටයුතු සඳහා ත්‍රිකුණාමලය වරාය පොලිසිය වෙත භාරදීමට නියමිතව ඇති බවයි නාවික හමුදාව නිවේදනය කර සිටින්නේ.