හුදෙකලා ප‍්‍රදේශවල ආයතනවලට අදාළ ලිපි බෙදාහැරීමට සූදානම් බව තැපැල් දෙපාර්තමේන්තුව පවසනවා. එම ප‍්‍රදේශවල රාජ්‍ය හෝ පෞද්ගලික ආයතන සිය දෙපාර්තමේන්තුවෙන් ඉල්ලීමක් කළහොත් ඒ අනුව කටයුතු කරන බවයි නියෝජ්‍ය තැපැල්පති රාජිත රණසිංහ මාධ්‍යවාර්තාකරු වෙත පැවසුවේ.
කොරෝනා වෛරස ව්‍යාප්තිය සැලකිල්ලට ගනිමින් කුරුණෑගල දිස්ති‍්‍රක්කයේ අත්හිටවූ තැපැල් කටයුතු ලබන සදුදා සිට යළි ආරම්භ කරන බවයි නියෝජ්‍ය තැපැල්පති රාජිත රණසිංහ වැඩිදුරටත් කියාසිටියේ.
මේ අතර අද සහ හෙට දුම්රිය ධාවනය සීමා කරන බව දුම්රිය දෙපාර්තමේන්තුව පැවසුවා. ඒ අනුව මෙම දින දෙකෙහි පෙරවරුවේ දුම්රිය 06ක් පමණක් කොළඹට පැමිණෙන බවත් එම දුම්රිය පස්වරුවේ නැවත ගමනාන්ත දක්වා ධාවනය කරන බවත් දුම්රිය සාමාන්‍යාධිකාරී ඩිලන්ත ප‍්‍රනාන්දු මාධ්‍යවාර්තාකරු වෙත කියා සිටියා. ඊට අමතරව ප‍්‍රදේශීය වශයෙන් ධාවනය කළ දුම්රිය එළෙසම ධාවනය වන බවයි දුම්රිය දෙපාර්තමේන්තුව පැවසුවේ.
